ବଲାଙ୍ଗୀର : ବଲାଙ୍ଗୀର ପୁଲିସର ମିସନ କ୍ଲିନ୍ କ୍ରିମିନାଲ ପରେ କ୍ଲିନ୍ କଫ୍ସିରପ୍ ଅଭିଯାନରେ ୩୭ ଜଣ କଫ୍ସିରପ୍ ବ୍ୟବସାୟୀ ଜେଲ୍ ଯାଇଛନ୍ତି। କଫ୍ସିରପ୍ ମୁଖ୍ୟ ଯୋଗାଣକାରୀ କଟକର ମାଷ୍ଟରମାଇଣ୍ଡ ତୋଫାନ ବଢ଼େଇ, ବଲାଙ୍ଗୀର ନେଟୱର୍କକୁ ପରିଚାଳନା କରୁଥିବା ରାକେଶ ପ୍ରଧାନ, ବରଗଡ଼ ନେଟୱର୍କକୁ ପରିଚାଳନା କରୁଥିବା ଗାଈସିଲେଟର ହରିଶ୍ଚନ୍ଦ୍ର ସାହୁ ସମେତ ୩୫ରୁ ଅଧିକ ନିଶା ବେପାରୀଙ୍କୁ ରବିବାର ସଂଧ୍ୟାରେ ପୁଲିସ ଗିରଫ କରିଥିଲା।
ଏସ୍ପି ଶ୍ରୀ କୁଶଲକର କହିଛନ୍ତି, ସୋମବାର ୪ ମହିଳାଙ୍କ ସମେତ ୩୭ ଜଣଙ୍କୁ କୋର୍ଟଚାଲାଣ କରାଯାଇଥିଲା। ଏମାନଙ୍କ ଭିତରେ ୨ ଜଣ ଉତ୍ତରପ୍ରଦେଶର ଥିବା ବେଳେ କଟକର ୬ ଜଣ ଓ ବରଗଡ଼ର ୩ ଜଣ ଓ ଅନ୍ୟ ୨୬ ଜଣ ବଲାଙ୍ଗୀରର ରହିଛନ୍ତି। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ଜେଲ୍ ହାଜତକୁ ପଠାଇ ଦିଆଯାଇଛି। ଏମାନଙ୍କ ପାଖରୁ ପୁଲିସ ୮୧ଟି ପେଟିରେ ଥିବା ୧୨ ହଜାର ୯୬୦ ବୋତଲ କଫ୍ସିରପ୍ ଜବତ କରିଛି। ଏପରିକି କଫ୍ସିରପ୍ ଚାଲାଣରେ ବ୍ୟବହୃତ ମହିନ୍ଦ୍ରା ଏକ୍ସୟୁଭି କାର୍, ୨ଟି ପିକ୍ଅପ୍ ଭ୍ୟାନ୍, ଗୋଟିଏ ଟାଟା ଏସିଇ ଭ୍ୟାନ୍, ୨ଟି ବାଇକ୍, ୧୭ଟି ମୋବାଇଲ୍ ଫୋନ୍, ସୁନାଗହଣା, ୭ ହଜାର ୫୦୦ ଟଙ୍କା ଜବତ କରିଛି। ସେହିପରି କଫ୍ସିରପ୍ ବ୍ୟବସାୟୀ ପ୍ରଶାନ୍ତ କ୍ଷେତୀ ପାଖରୁ ଗୋଟିଏ ଦେଶୀ ବନ୍ଧୁକ ପୁଲିସ ଜବତ କରିଛି। କୋଲକାତାରୁ କଟକ ଓ ସେଠାରୁ ବଲାଙ୍ଗୀରକୁ କଫ୍ସରିପ୍ ଆସୁଥିବା ବେଳେ କୋଲକାତାର କଫ୍ସିରପ୍ ଯୋଗାଣ କରୁଥିବା କମ୍ପାନିର ୨ କୋଟି ଟଙ୍କା ଥିବା ବ୍ୟାଙ୍କ ଆକାଉଣ୍ଟକୁ ପୁଲିସ ଫ୍ରିଜ୍ କରିଦେଇଛି।