ଘଟଗାଁ ବ୍ଲକ୍ ବାଲିଯୋଡ଼ି ୟୁଜିୟୁପି ସ୍କୁଲର ପଞ୍ଚମ ଶ୍ରେଣୀ ଛାତ୍ରୀଙ୍କୁ ଦୁର୍ବ୍ୟବହାର ଘଟଣାରେ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ସୁଧାଂଶୁ ଶେଖର ମହାନ୍ତିଙ୍କୁ ନିଲମ୍ବନ କରାଯାଇଛି। ଘଟଗାଁ ବିଇଓ କୃଷ୍ଣଚନ୍ଦ୍ର ପରିଡ଼ା ଚିଠି ନମ୍ବର ୪୭୫ ତା୨୪.୦୨.୨୦୨୩ରେ ଶ୍ରୀ ମହାନ୍ତିଙ୍କୁ ନିଲମ୍ବିନ କରିଛନ୍ତି।
ପ୍ରାପ୍ତ ସୂଚନା ଅନୁଯାୟୀ, ବାଲିଯୋଡ଼ି ୟୁଜିୟୁପି ସ୍କୁଲର ପଞ୍ଚମ ଶ୍ରେଣୀ ଛାତ୍ରୀଙ୍କୁ ପ୍ରଧାନଶିକ୍ଷକ ଶ୍ରୀ ମହାନ୍ତି ବାରମ୍ବାର ଦୁର୍ବ୍ୟବହାର କରୁଥିଲେ। ଏନେଇ ଗତ ୨୦ ତାରିଖରେ ଛାତ୍ରୀଙ୍କ ବାପା ସକା ମୁଣ୍ତା ବିଇଓଙ୍କଠାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ବିଇଓ ଶ୍ରୀ ମହାପାତ୍ର ତୁରନ୍ତ ଘଟଣାର ତଦନ୍ତ ନିର୍ଦେଶ ଦେଇଥିଲେ। ଏବିଇଓ ସଂଜୟ କୁମାର ପଲେଇ, ସିଆର୍ସିସି ରୋହିତ କୁମାର ବେହେରା, ମହିଳା କର୍ମଚାରୀ ନିବେଦିତା ବଳ ଓ ନିବେଦିତା ସାହୁ ସ୍କୁଲକୁ ଯାଇ ତଦନ୍ତ କରିଥିଲେ। ମେଲାଣ ଗ୍ରାମକୁ ଯାଇ ଛାତ୍ରୀଙ୍କ ବୟାନ ରେକର୍ଡ କରିଥିଲେ। ଆଜି ତଦନ୍ତକାରୀ ଟିମ୍ ବିଇଓଙ୍କୁ ରିପୋର୍ଟ ପ୍ରଦାନ କରିଥିଲେ। ଛଅମାସ ପୂର୍ବରୁ ଆଉଦୁଇଜଣ ଛାତ୍ରୀଙ୍କୁ ମଧ୍ୟ ପ୍ରଧାନଶିକ୍ଷକ ଶ୍ରୀ ମହାନ୍ତି ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା। ସେମାନଙ୍କର ମଧ୍ୟ ବୟାନ ରେକର୍ଡ କରାଯାଇଥିଲା। ଶୁକ୍ରବାର ଅପରାହ୍ଣରେ ବିଇଓ ଶ୍ରୀ ମହାପାତ୍ର ବିଦ୍ୟାଳୟର ପ୍ରଧାନଶିକ୍ଷକ ଶ୍ରୀ ମହାନ୍ତିଙ୍କୁ ଚାକିରିରୁ ନିଲମ୍ବନ କରିଛନ୍ତି।