ଗତ ୨ବର୍ଷ ଧରି କୋଭିଡ ସହିତ ସଂଘର୍ଷ କରୁଥିବା ଲୋକମାନଙ୍କ ପାଇଁ ଇନଫ୍ଲୁଏଞ୍ଜା ସଂକ୍ରମଣ ଚିନ୍ତା ବଢ଼ାଇଛି। ଦେଶବ୍ୟାପୀ ଗତ ୨ ମାସ ମଧ୍ୟରେ ଇନଫ୍ଲୁଏଞ୍ଜା ମାମଲାରେ ବୃଦ୍ଧି ଦେଖିବାକୁ ମିଳିଛି। ଇନଫ୍ଲୁଏଞ୍ଜା କାରଣରୁ ଲୋକମାନଙ୍କଠାରେ ପ୍ରବଳ ଜ୍ବର ଓ ଥଣ୍ଡା ସାଙ୍ଗକୁ ଦୀର୍ଘଦିନ ଧରି ଅସୁସ୍ଥତା ଲାଗି ରହୁଛି। ଏହାକୁ ନଜରରେ ରଖି ଆଇସିଏମ୍ଆର (ଇଣ୍ଡିଆନ କାଉନସିଲ ଅଫ୍ ମେଡିକାଲ ରିସର୍ଚ୍ଚ) ସତର୍କ ସୂଚନା ଜାରି କରିଛନ୍ତି।
ଆଇସିଏମ୍ଆର ପକ୍ଷରୁ କୁହାଯାଇଛି ଯେ ଏଚ୍୩ଏନ୍୨ ଭୂତାଣୁର ଉପ-ପ୍ରଜାତି ଇନଫ୍ଲୁଏଞ୍ଜା ପାଇଁ ଜ୍ବର ମାମଲା ବୃଦ୍ଧି ପାଉଛି। ଅଧିକାଂଶ ରୋଗୀ ଦୀର୍ଘ ଦିନ ପର୍ଯ୍ୟନ୍ତ ଅସୁସ୍ଥ ରହୁଛନ୍ତି। ସେମାନଙ୍କଠାରେ କରୋନାର ସମସ୍ତ ଲକ୍ଷଣ ଦେଖାଦେଉଛି। ଗତବର୍ଷ ଡିସେମ୍ବର ୧୫ତାରିଖରୁ ଆଜି ପର୍ଯ୍ୟନ୍ତ ହୋଇଥିବା ନିରୀକ୍ଷଣରୁ ଏଭଳି ସଙ୍କେତ ମିଳିଛି। ଦେଶର ୩୦ଟି ଭିଆରଡିଏଲ୍(ଭାଇରାଲ ରିସର୍ଚ୍ଚ ଏଣ୍ଡ ଡାଏଗ୍ନୋଷ୍ଟିକ ଲା ବୋରେଟାରି)ରୁ ସଂଗୃହୀତ ତଥ୍ୟ ଅନୁସାରେ ଏସ୍ଏଆରଆଇ(ଗଭୀର ଶ୍ବାସ ସଂକ୍ରମଣ) ଲକ୍ଷଣ ଥିବା ରୋଗୀଙ୍କଠାରେ ଇନ୍ଫ୍ଲୁଏଞ୍ଜା-ଏ ଏଚ୍୩ଏନ୍୨ ଦେଖିବାକୁ ମିଳିଛି। ହସ୍ପିଟାଲରେ ଭର୍ତ୍ତି ହୋଇଥିବା ଏସ୍ଏଆରଆଇ ସହିତ ଏଚ୍୩ଏନ୍୨ ଥିବା ୯୨ ପ୍ରତିଶତ ରୋଗୀଙ୍କଠାରେ ଜ୍ବର, ୮୬ ପ୍ରତିଶତଙ୍କଠାରେ କାଶ, ୨୭ ପ୍ରତିଶତଙ୍କଠାରେ ନିଶ୍ବାସ ପ୍ରଶ୍ବାସରେ ସମସ୍ୟା, ୧୬ ପ୍ରତିଶତଙ୍କଠାରେ ନିମୋନିଆ ଓ ୬ ପ୍ରତିଶତଙ୍କଠାରେ ସିଜର(ବେହୋସ ହୋଇଯିବା) ନଜରକୁ ଆସିଛି। ଏଚ୍୩ଏନ୍୨ ଥିବା ଏସ୍ଏଆରଆଇ ଥିବା ୧୦ ପ୍ରତିଶତ ରୋଗୀଙ୍କୁ ଅକ୍ସିଜେନ୍ର ଆବଶ୍ୟକତା ପଡ଼ୁଥିବା ବେଳେ ୭ ପ୍ରତିଶତ ଆଇସିୟୁରେ ଭର୍ତି ହେଉଛନ୍ତି।
ବରିଷ୍ଠ ଡାକ୍ତରଙ୍କ ମତରେ ସଂକ୍ରମଣ ଜ୍ବର ଭଲ ହେବା ପାଇଁ ଅଧିକ ଦିନ ଲାଗୁଛି। ରୋଗୀ ସୁସ୍ଥ ହେଲେ ବି ଲକ୍ଷଣ ଦୀର୍ଘ ଦିନ ପର୍ଯ୍ୟନ୍ତ ରହୁଛି। ଏହି ନୂଆ ପ୍ରଜାତି ଇନଫ୍ଲୁଏଞ୍ଜା ଜୀବନ ପାଇଁ ବିପଜ୍ଜନକ ନୁହେଁ। କିନ୍ତୁ କିଛି ରୋଗୀଙ୍କର ଶ୍ବାସକ୍ରିୟାରେ ସମସ୍ୟା ଦେଖାଦେଉଛି। କିଛି ରୋଗୀଙ୍କ ଠାରେ ଲକ୍ଷଣ କରୋନା ସହ ସମାନ ରହୁଛି। ବିଶେଷଜ୍ଞମାନେ କହୁଛନ୍ତି, ଏଚ୍୩ଏନ୍୨ ଭାଇରସ୍ ଅନ୍ୟ ଇନଫ୍ଲୁଏଞ୍ଜା ଉପ-ପ୍ରଜାତି ଅପେକ୍ଷା ଅଧିକ ସଂଖ୍ୟାରେ ହସ୍ପିଟାଲ୍ରେ ରୋଗୀଙ୍କ ସଂଖ୍ୟା ବଢ଼ାଉଛି।
ଅପରପକ୍ଷରେ ସାଧାରଣ ଥଣ୍ଡାକାଶରେ ଆଣ୍ଟିବାୟୋଟିକ୍ସ ସେବନ ନ କରିବା ପାଇଁ ଭାରତୀୟ ମେଡିକାଲ ଆସୋସିଏସନ (ଆଇଏମ୍ଏ) ପକ୍ଷରୁ ପରାମର୍ଶ ଦିଆଯାଇଛି। ଆଇଏମ୍ଏ ପକ୍ଷରୁ କୁହାଯାଇଛି ଯେ ଋତୁ ପରିବର୍ତ୍ତନ ସମୟରେ ଅଧିକାଂଶ ଲୋକଙ୍କୁ ଥଣ୍ଡା କାଶ ହୋଇଥାଏ। ରୋଗୀକୁ ଆଣ୍ଟିବାୟୋଟିକ୍ସ ସେବନ ପାଇଁ ଲେଖିବା ପୂର୍ବରୁ ଡାକ୍ତରମାନେ ପ୍ରଥମେ ପରୀକ୍ଷା କରି ଦେଖିବା ଉଚିତ। ରୋଗ ବୀଜାଣୁଜନିତ ନା ଭୂତାଣୁଜନିତ। ଆଣ୍ଟିବାୟୋଟିକ୍ସ କେବଳ ବୀଜାଣୁଙ୍କୁ ମାରିଥାଏ, ଭୂତାଣୁଙ୍କୁ ନୁହେଁ। ସମ୍ପ୍ରତି ସାରା ଦେଶରେ ବହୁ ଲୋକଙ୍କଠାରେ ଥଣ୍ଡାକାଶ ହେବା ଦେଖିବାକୁ ମିଳୁଛି। ହେଲେ ପ୍ରତ୍ୟେକ ଲୋକଙ୍କୁ ଆଜିଥ୍ରୋମାଇସିନ, ଆମୋକ୍ସିକ୍ଲାବ ପରି ଆଣ୍ଟିବାୟୋଟିକ୍ସ (ବୀଜାଣୁନାଶକ) ଦେବା ଅନୁଚିତ।