ନୂଆଦିଲ୍ଲୀ: ତୁର୍କୀର ଦକ୍ଷିଣାଞ୍ଚଳ ସହର ହତୟରେ ୨୦୩ ଘଣ୍ଟା ପରେ ଧ୍ବଂସସ୍ତୂପ ଭିତରୁ ଜଣେ ମହିଳାଙ୍କୁ ଜୀବିତ ଉଦ୍ଧାର କରାଯାଇଛି । ସଂପୂର୍ଣ୍ଣ ଧ୍ବସ୍ତ ହୋଇଯାଇଥିବା କୋଠାର ଧ୍ବଂସାବଶେଷ ତଳୁ ଉକ୍ତ ମହିଳାଙ୍କୁ ଜୀବିତା ଉଦ୍ଧାର କରାଯିବା ଏକ ବିସ୍ମୟ ବୋଲି ଉଦ୍ଧାରକାରୀ ଦଳ କହିଛନ୍ତି। ସେହିଭଳି କହରାମନମରାସ ପ୍ରଦେଶର ଏକ ଆପାର୍ଟମେଣ୍ଟ ବ୍ଲକ୍ର ଭଗ୍ନାବଶେଷ ତଳୁ ଉଦ୍ଧାରକାରୀ ଦଳ ମଙ୍ଗଳବାର ୨ ଭାଇଙ୍କୁ ଜୀବିତ ଉଦ୍ଧାର କରିଛନ୍ତି। ଭୂକମ୍ପ ହେବାର ୧୯୮ ଘଣ୍ଟା ପରେ ସେମାନଙ୍କୁ ଉଦ୍ଧାର କରାଯାଇଛି। ତୁର୍କୀର ୩ଟି ପ୍ରଦେଶରେ ଉଦ୍ଧାର କାର୍ଯ୍ୟ ଜାରି ରହିଛି। ଅନ୍ୟ ୭ଟି ପ୍ରଦେଶରେ ଉଦ୍ଧାର କାର୍ଯ୍ୟ ପ୍ରାୟ ଶେଷ ହୋଇଯାଇଛି। ହତୟ ପ୍ରଦେଶର ଜଣେ ବ୍ୟକ୍ତି ଭୂକମ୍ପରେ ତାଙ୍କ ଭଉଣୀ ଏବଂ ୪ ପୁତୁରାଙ୍କୁ ହରାଇ ଦେଇଛନ୍ତି। ସେ କହିଛନ୍ତି, ଜୀବିତ ହୁଅନ୍ତୁ କିମ୍ବା ମୃତ ମୁଁ କେବଳ ମୋ ପରିବାର ସଦସ୍ୟଙ୍କୁ ଦେଖିବାକୁ ଚାହେ।
ତୁର୍କୀ ଏବଂ ସିରିୟାରେ ୪୧,୫୦୦ରୁ ଅଧିକ କୋଠା ଧ୍ବଂସ ହୋଇଯାଇଛି।ଭୂକମ୍ପରୁ ବଞ୍ଚିଯାଇଥିବା ଲୋକମାନେ ଏବେ ଦୁର୍ଦ୍ଦିନକୁ ସାମ୍ନା କରୁଛନ୍ତି। ଖାଇବାକୁ ଖାଦ୍ୟ ନାହିଁ କି ପିଇବାକୁ ସ୍ବଚ୍ଛ ପାନୀୟ ଜଳ ନାହିଁ। ସିରିୟାରେ ଅତି ସାଂଘାତିକ ସ୍ଥିତି। ସିରିୟାର ଜଣେ ୪୩ ବର୍ଷୀୟା ମହିଳା ଆୟେଶା ଏଭଳି ଦୁର୍ଦ୍ଦିନ ଦେଖି ସମ୍ପୂର୍ଣ୍ଣ ଭାଙ୍ଗି ପଡ଼ିଛନ୍ତି। ଆାୟେଶା କହିଛନ୍ତି, ଏତେ ଯନ୍ତ୍ରଣା ଭୋଗିବା ଅପେକ୍ଷା ଭୂକମ୍ପରେ ମରି ଯାଇଥିଲେ ଭଲ ହୋଇଥାନ୍ତା। ଆୟେଶାଙ୍କ ଘର ଉତ୍ତରପଶ୍ଚିମ ସିରିୟା ସହରର ଅତରେବ୍ରେ। ଭୂକମ୍ପକୁ ୮ ଦିନ ବିତିଯାଇଥିଲେ ବି ଆୟେଶାଙ୍କ ପାଖରେ ଏବେ ବି ପାଣି ନାହିଁ କି ବିଦ୍ୟୁତ ନାହିଁ। ସେ ଏବଂ ତାଙ୍କ ପରିବାରର ସମସ୍ତ ୧୨ ଜଣ ସଦସ୍ୟ ଗୋଟିଏ ଟେଣ୍ଟ୍ରେ ରହୁଛନ୍ତି। ଆୟେଶା ଯକୃତ ରୋଗରେ ପୀଡ଼ିତ ଏବଂ ତାଙ୍କର ଚିକିତ୍ସା ହୋଇପାରୁନି। ଭୂକମ୍ପ ଯୋଗୁଁ ତାଙ୍କର ଏବଂ ତାଙ୍କ ସ୍ବାମୀଙ୍କ ରୋଜଗାର ଚାଲିଯାଇଛି। ସେମାନଙ୍କ ଟାକ୍ସି ଭାଙ୍ଗି ଚୁରମାର ହୋଇଯାଇଛି। ସେ ପୋଷାକ ବ୍ୟବସାୟ କରୁଥିଲେ। କିନ୍ତୁ ସବୁକିଛି ଏବେ ଭୂକମ୍ପ ଯୋଗୁଁ ନଷ୍ଟ ହୋଇଯାଇଛି।