ନୂଆଦିଲ୍ଲୀ: ଗୋରୁ ଚରାଇବା ଲାଗି ଲୁଚି ଲୁଚି ଭାରତରେ ପ୍ରବେଶ କରୁଥିବା ବାଂଲାଦେଶୀ କୃଷକମାନଙ୍କ ଆକ୍ରମଣରେ ‘ବର୍ଡର୍ ସିକ୍ୟୁରିଟି ଫୋର୍ସ’ର (ବିଏସ୍ଏଫ୍) ୨ଜଣ ଯବାନ ସାଙ୍ଘାତିକ ଆହତ ହୋଇଛନ୍ତି ବୋଲି ଜାରି କରିଥିବା ବିବୃତିରେ ‘ବିଏସ୍ଏଫ୍’ କହିଛି।
୩୫ତମ ବାଟାଲିୟନ୍ର ଦୁଇଜଣ ଯବାନ ପାଟ୍ରୋଲିଙ୍ଗ୍ କରୁଥିବା ବେଳେ ନିର୍ମଳଚାର ସୀମାନ୍ତ ପୋଷ୍ଟ୍ ଅଞ୍ଚଳରେ ଘଟିଥିବା ଉପରୋକ୍ତ ଘଟଣା ଘଟିଛି ବୋଲି ‘ବିଏସ୍ଏଫ୍’ କହିଛି।ଗୋରୁମାନଙ୍କୁ ଚରାଇବା ଲାଗି ବିଲରେ ପଶି ବାଂଲାଦେଶୀ କୃଷକମାନେ ଜାଣିଶୁଣି ଫସଲ ନଷ୍ଟ କରୁଛନ୍ତି ବୋଲି ଭାରତୀୟ କୃଷକମାନେ ଅଭିଯୋଗ କରିଥିଲେ। କୃଷକମାନଙ୍କ ନିରାପତ୍ତାକୁ ସୁନିଶ୍ଚିତ କରିବା ଲାଗି ସୀମାନ୍ତ ନିକଟରେ ‘ବିଏସ୍ଏଫ୍’ ଅସ୍ଥାୟୀ ପୋଷ୍ଟ୍ ନିର୍ମାଣ କରିଥିଲେ।
ରବିବାର ଦିନ ୨ଜଣ ଯବାନ ସେ ଅଞ୍ଚଳରେ ପାଟ୍ରୋଲିଙ୍ଗ୍ କରୁଥିବା ବେଳେ ଭାରତ ସୀମାକୁ ଗୋରୁ ନେଇ ପ୍ରବେଶ କରୁଥିବା ବାଂଲାଦେଶୀ କୃଷକମାନଙ୍କୁ ଅଟକାଇବାରୁ ସେମାନେ ଠେଙ୍ଗା ଓ ଜମିଚାଷରେ ବ୍ୟବହାର କରାଯାଉଥିବା ତୀକ୍ଷ୍ଣ ଧାରଯୁକ୍ତ ଉପକରଣଗୁଡ଼ିକରେ ଆକ୍ରମଣ କରିଥିଲେ।
ସେମାନଙ୍କ ଆକ୍ରମଣରେ ଦୁଇଜଣ ଯବାନ ସାଂଘାତିକ ଆହତ ହୋଇଛନ୍ତି। ଯବାନମାନଙ୍କର ଅସ୍ତ୍ରଶସ୍ତ୍ର ଛଡ଼ାଇ ନେଇ ଆକ୍ରମଣକାରୀ ଦୁର୍ବୃତ୍ତମାନେ ବାଂଲାଦେଶକୁ ପଳାଇଯାଇଛନ୍ତି ବୋଲି ଉକ୍ତ ବିବୃତିରେ ଉଲ୍ଲେଖ ଅଛି।
ଘଟଣା ସଂକ୍ରାନ୍ତରେ ସୂଚନା ପାଇବା ପରେ ଘଟଣାସ୍ଥଳରେ ଅଧିକ ନିରାପତ୍ତା କର୍ମଚାରୀ ପହଞ୍ଚି ଆହତ ଯବାନଦ୍ବୟଙ୍କୁ ନିକଟତମ ଡାକ୍ତରଖାନାକୁ ନିଆଯାଇଥିଲା।
‘ବିଏସ୍ଏଫ୍’ ଏ ଘଟଣା ସଂକ୍ରାନ୍ତରେ ‘ବର୍ଡର୍ ଗାର୍ଡ ବାଂଲାଦେଶ’କୁ (ବିଜିବି) ଜଣାଇବା ସହିତ ଭବିଷ୍ୟତରେ ଏଭଳି ଘଟଣା ପୁନର୍ବାର ଘଟିବାରୁ ବାଧା ଦେବା ଏବଂ ଅପହୃତ ଅସ୍ତ୍ରଶସ୍ତ୍ର ସବୁକୁ ଫେରସ୍ତ ଆଣିବା ନିମନ୍ତେ ‘ଫ୍ଲାଗ୍ ମିଟିଙ୍ଗ୍’ ମଧ୍ୟ ଡକାଇଛି।