ଗୁରୁବାର ରାତିରେ ଛତିଶଗଡ଼ର ବଦୌଲା ବଜାର-ଭାଟପଡ଼ା ଜିଲ୍ଲାରେ ଗୋଟାଏ ଟ୍ରକ୍ ଗୋଟାଏ ପିକ୍ଅପ୍ ଭ୍ୟାନ୍ ସହିତ ଧକ୍କା ଖାଇବାରୁ ୪ଜଣ ପିଲାଙ୍କ ସମେତ ପ୍ରାୟ ୧୧ଜଣ ବ୍ୟକ୍ତିଙ୍କର ମୃତ୍ୟୁ ଘଟିଥିବା ବେଳେ ଆଉ କେତେ ଜଣ ଆହତ ହୋଇଥିବା କଥା ଆଜି ପୁଲିସ କହିଛି।
ସଂଗୃହୀତ ସୂଚନା ଅନୁସାରେ, ମୃତ ବ୍ୟକ୍ତିମାନେ ହେଉଛନ୍ତି ସାହୁ ପରିବାରର। ପାରିବାରିକ କାର୍ଯ୍ୟରେ ସେମାନେ ଖିଲୋରାରୁ ଅର୍ଜୁନିକୁ ଆସିଥିଲେ। ସେମାନେ ଭାଟପଡ଼ା ଆଡ଼କୁ ଆସୁଥିବା ବେଳେ ଖମାରିଆ ନିକଟ ‘ଡିପିଡବ୍ଲୁଏସ୍’ ନିକଟରେ ଦୁର୍ଘଟଣା ଘଟିଥିଲା।ଏହି ଦୁର୍ଘଟଣା ଯୋଗୁଁ ଅନ୍ୟୂନ ୧୧ଜଣ ବ୍ୟକ୍ତିଙ୍କର ମୃତ୍ୟୁ ଘଟିଛି ଏବଂ ୧୨ଜଣ ଲୋକ ଆହତ ହୋଇଥିବା କଥା କୁହାଯାଉଛି।
ଦୁର୍ଘଟଣା ଘଟିଥିବା ଖବର ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆହତମାନଙ୍କୁ ଡାକ୍ତରଖାନା ପଠାଇବାର ବ୍ୟବସ୍ଥା କରିଥିଲା। ଅଧିକ ଚିକିତ୍ସା ନିମନ୍ତେ ସେମାନଙ୍କ ମଧ୍ୟରୁ କେତେକଙ୍କୁ ରାୟପୁର ରେଫର୍ କରାଯାଇଛି।
ସେହିପରି, ମୃତ ବ୍ୟକ୍ତିମାନଙ୍କର ଶବ ବ୍ୟବଚ୍ଛେଦ କରିବା ନିମନ୍ତେ ପଠାଇବା ସହ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଆରମ୍ଭ କରିଛି। ଏହାଛଡ଼ା, ଟ୍ରକ୍ ଛାଡ଼ି ଫେରାର୍ ହୋଇଯାଇଥିବା ଟ୍ରକ୍ ଡ୍ରାଇଭର୍ଙ୍କର ସନ୍ଧାନ ପାଇବା ପାଇଁ ମଧ୍ୟ ଉଦ୍ୟମ ଚାଲିଛି।
ମୁଖ୍ୟମନ୍ତ୍ରୀ ଭୂପେଶ ବଘେଲ୍ ଘଟଣା ସଂକ୍ରାନ୍ତରେ ଅବଗତ ହେବା ପରେ ଦୁଃଖ ପ୍ରକାଶ କରିବା ସହ ମୃତବ୍ୟକ୍ତିଙ୍କ ପରିବାରକୁ ସହାୟତା ଏବଂ ଆହତମାନଙ୍କର ସର୍ବୋତ୍ତମ ଡାକ୍ତରୀ ଚିକିତ୍ସା ଯୋଗାଇ ଦେବା ପାଇଁ ଜିଲ୍ଲା ପ୍ରଶାସନିକ ଅଧିକାରୀଙ୍କୁ ନିର୍ଦେଶ ଦେଇଛନ୍ତି।