ହୋଲି ସମୟରେ ଜଣେ ଜାପାନୀ ମହିଳାଙ୍କ ସହିତ ଅସଦାଚରଣ କରିଥିବା ଘଟଣାରେ ଜଣେ ନାବାଳକ ସମେତ ୩ଜଣଙ୍କୁ ଗିରଫ କରିଥିବା କଥା ଦିଲ୍ଲୀ ପୁଲିସ କହିଛି।ପୁଲିସ କହିବା ଅନୁସାରେ, ହୋଲି ଖେଳ ସମୟରେ ରଙ୍ଗ ମାରିବା ବାହାନାରେ ଏହି ତରୁଣମାନେ ଉକ୍ତ ଜାପାନୀ ମହିଳା ସହିତ ଅସଦାଚରଣ କରିଥିଲେ। ସେ ସମୟର ଦୃଶ୍ୟ ଥିବା ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ୍ ହେବା ପରେ ସେମାନଙ୍କୁ ଧରାଯାଇଛି।ଘଟଣା ସଂକ୍ରାନ୍ତରେ ଜାରି କରିଥିବା ବିବୃତିରେ ଦିଲ୍ଲୀ ପୁଲିସ କହିଛି, ଫିଲ୍ଡ୍ ଅଫିସର୍ ଏବଂ ସ୍ଥାନୀୟ ଗୁଇନ୍ଦାଙ୍କ ଉଦ୍ୟମ ଯୋଗୁଁ ଭିଡିଓରେ ଦେଖାଯାଉଥିବା ତରୁଣମାନଙ୍କୁ ଚିହ୍ନଟ କରାଯାଇଥିଲା। ଧରାପଡ଼ିଥିବା ୩ ତରୁଣ ଦୋଷ ସ୍ବୀକାର କରିଛନ୍ତି।
ଗଣମାଧ୍ୟମକୁ ‘ଡିସିପି’ ସଞ୍ଜୟ କୁମାର ସୈନ୍ କହିଛନ୍ତି, ପୀଡ଼ିତ ମହିଳାଙ୍କୁ ଚିହ୍ନଟ କରିବାରେ ସହାୟତା କରିବା ଲାଗି ଜାପାନୀ ଦୂତାବାସ ସହିତ ଯୋଗାଯୋଗ କରାଯାଇଥିଲା। କିନ୍ତୁ, ସମୋନେ କହିଲେ ଯେ, ଘଟଣା ସଂକ୍ରାନ୍ତରେ ସେମାନଙ୍କ ନିକଟରେ କୌଣସି ସୂଚନା ନାହିଁ।
କିନ୍ତୁ, ପୁଲିସ କହିବା ଅନୁସାରେ, ମହିଳାଜଣକ ହେଉଛନ୍ତି ଜେଣ ଜାପାନୀ ପର୍ଯ୍ୟଟକ। ସେ ଜାତୀୟ ରାଜଧାନୀର ପହାଡ଼ଗଞ୍ଜରେ ରହୁଥିଲେ। ଏବେ ସେ ବାଂଲାଦେଶ ଚାଲିଯାଇଛନ୍ତି। ପହାଡ଼ଗଞ୍ଜ ଥାନାରେ ଏ ସଂକ୍ରାନ୍ତରେ କୌଣସି ମୌଖିକ ବା ଲିଖିତ ଅଭିଯୋଗ ହୋଇନାହିଁ।
ସାମାଜିକ ଗଣମାଧ୍ୟରେ ପ୍ରସାରିତ ହେଉଥିବା ଭିଡିଓରେ ଦେଖାଯାଉଛି, ଦଳେ ଲୋକ ‘ହୋଲି ହୈ’ ଚିତ୍କାର କରି ବ୍ୟତିବ୍ୟସ୍ତ ହେଉଥିବା ଜଣେ ମହିଳାଙ୍କୁ ଘେରିପେରି ଟଣାଓଟରା କରି ରଙ୍ଗ ମାରୁଛନ୍ତି। ଲୋକମାନଙ୍କ ମଧ୍ୟରୁ କିଏ ଜଣେ ସେ ମହିଳାଙ୍କ ମୁଣ୍ଡରେ ଅଣ୍ଡାଟିଏ ପିଟି ଭାଙ୍ଗୁଥିବା ବି ଦେଖାଯାଉଛି। ଶେଷରେ ଦେଖାଯାଉଛି ମହିଳାଜଣକ ରଙ୍ଗରେ ଏମିତି ବୁଡ଼ିଯାଇଛନ୍ତି ଯେ, ତାଙ୍କୁ ଚିହ୍ନିବା ସମ୍ଭବ ହେଉନାହିଁ।