ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କାର୍ଯ୍ୟକାଳରେ ଲୋକମାନଙ୍କ ମୁଣ୍ଡପିଛା ଆୟରେ ଦୁଇଗୁଣା ବୃଦ୍ଧିଘଟିଛି। ୨୦୧୪-୧୫ରୁ ୨୦୨୨-୨୩ ମଧ୍ୟରେ ମୁଣ୍ଡପିଛା ଆୟ ୮୬,୬୪୭ ଟଙ୍କାରୁ ବୃଦ୍ଧି ପାଇ ୧,୭୨,୦୦୦ ଟଙ୍କା ହୋଇଛି। ନଅ ବର୍ଷ ମଧ୍ୟରେ ସେଥିରେ ୯୯ ପ୍ରତିଶତ ପାଖାପାଖି ବୃଦ୍ଧି ଘଟିଛି। ୨୦୨୨-୨୩ରେ ମୁଣ୍ଡପିଛା ଆୟ ୧,୭୨,୦୦୦ ଟଙ୍କା ହେବ ବୋଲି ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ଜାରି କରିଥିବା ରିପୋର୍ଟରେ ଆକଳନ କରାଯାଇଛି। ୨୦୨୦ରେ କୋଭିଡ୍ ମହାମାରୀ ବ୍ୟାପିବା ଯୋଗୁଁ ମୁଣ୍ଡପିଛା ଆୟ ହ୍ରାସ ପାଇଥିଲା। ଏହାପରେ ୨୦୨୧-୨୨ ଓ ୨୦୨୨-୨୩ରେ ସେଥିରେ ପୁନର୍ବାର ବୃଦ୍ଧି ହୋଇଥିବା ଏନ୍ଏସ୍ଓ ଜଣାଇଛି।
ଏ ସମ୍ପର୍କରେ ଅର୍ଥନୀତିଜ୍ଞ ଜୟତି ଘୋଷ କହିଛନ୍ତି ଯେ ଯଦି ମୁଦ୍ରାସ୍ଫୀତି ହାର ବିଚାରକୁ ନିଆଯିବ ତେବେ ଜିଡିପିରେ ହୋଇଥିବା ବୃଦ୍ଧି ଏତେ ଅଧିକ ନୁହେଁ ବୋଲି କୁହାଯାଇପାରିବ। ଏଥିରେ ଯାହା ବୃଦ୍ଧି ଘଟିଛି ତାହାର ଲାଭ ଜନସଂଖ୍ୟାର ଶୀର୍ଷ ସୋପାନରେ ଥିବା ୧୦ ପ୍ରତିଶତ ଲୋକଙ୍କ ପାଖରେ ପହଞ୍ଚିଛି। ମଧ୍ୟମ ମଜୁରି ହ୍ରାସ ପାଉଥିବା ସେ କହିଛନ୍ତି। ସେହିପରି ଅର୍ଥନୈତିକ ଗବେଷଣା ସଂସ୍ଥା ଏନ୍ଆଇପିଏଫ୍ପିର ପୂର୍ବତନ ନିର୍ଦେଶକ ପିନାକି ମିଶ୍ର କହିଛନ୍ତି ଯେ ବିଶ୍ବ ବିକାଶ ସୂଚୀ ଅନୁସାରେ ୨୦୧୪-୧୯ରେ ଭାରତର ମୁଣ୍ଡପିଛା ଆୟରେ ବାର୍ଷିକ ବୃଦ୍ଧି ହାର ୫.୬ ପ୍ରତିଶତ ଥିଲା।