ଭୁବନେଶ୍ବର: ରାଜ୍ୟର ବରଗଡ଼ ଓ ଝାରସୁଗୁଡ଼ାରେ ଚିହ୍ନଟ ହୋଇଥିବା ନକଲି ଔଷଧ ଲିଙ୍କ୍ରେ ଉତ୍ତର ପ୍ରଦେଶର ଷ୍ଟେଟ୍ ଟାସ୍କ ଫୋର୍ସ ଏକ ବଡ଼ ଧରଣର ଚଢ଼ଉ କରିଛି। ସିକନ୍ଦରାବାଦ ପୁଲିସ ଷ୍ଟେସନ୍ ଅଧୀନ ବୁଲନ୍ଦସହରର ଅଶୋକ କୁମାରଙ୍କ ଘରେ ଚଢ଼ଉ କରାଯାଇଛି। ଏକ ଗୋଦାମରୁ ବିପୁଳ ପରିମାଣର ନକଲି ଔଷଧ ଜବତ ହୋଇଛି। ଯାହାର ମୂଲ୍ୟ ୭.୩୫ କୋଟି ଟଙ୍କା ହେବ। ସେଠାରୁ ନଗଦ ୪ଲକ୍ଷ ଟଙ୍କା ମିଳିଛି। ହେଲେ ଏହି ଚଢ଼ଉରେ କାହିଁକି ଓଡ଼ିଶା ସରକାର ଗଠନ କରିଥିବା ଟାସ୍କଫୋର୍ସ ସାମିଲ ହେଲା ନାହିଁ, ତାହା ଚର୍ଚ୍ଚାକୁ ଆସିଲାଣି। ଗତମାସ ୧୪ତାରିଖରେ ସ୍ବାସ୍ଥ୍ୟ ବିଭାଗ ପକ୍ଷରୁ ରାଜ୍ୟ ଡ୍ରଗ୍ ଟାସ୍କ ଫୋର୍ସକୁ ଉତ୍ତର ପ୍ରଦେଶକୁ ଯିବା ଲାଗି ନିର୍ଦେଶ ଦିଆଯାଇଥିଲା। ଇତିମଧ୍ୟରେ୧୫ଦିନ ବିତି ଯାଇଥିଲେ ହେଁ ରାଜ୍ୟ ଟାସ୍କ ଫୋର୍ସ ଉତ୍ତର ପ୍ରଦେଶ ଯାଇପାରିଲା ନାହିଁ। ପୂର୍ବରୁ ଆଉ ଏକ ନକଲି ଔଷଧ ଘଟଣାରେ ରାଜ୍ୟର ସ୍ବତନ୍ତ୍ର ଟିମ୍ ବିହାର ଯାଇଥିବା ବେଳେ ଏବେ ଉତ୍ତର ପ୍ରଦେଶ ନ ଯିବା ପଛରେ କାରଣ କ’ଣ ?
ଅତ୍ୟନ୍ତ ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ, କେଉଁ ଟିମ୍ ଉତ୍ତର ପ୍ରଦେଶ ଯିବ ତାହାକୁ ନେଇ ରାଜ୍ୟ ଡ୍ରଗ୍ ଟାସ୍କ ଫୋର୍ସ ଓ ଭେଷଜ ନିର୍ଦେଶାଳୟ ଭିତରେ ଚାଲିଥିବା ଟଣାଓଟରା ପାଇଁ ଏଭଳି ପରିସ୍ଥିତି ଉପୁଜିଥିବା କୁହାଯାଉଛି। ଫେବ୍ରୁଆରି ୧୪ ତାରିଖରେ ଯେଉଁ ଟିମ୍ ସଂପର୍କରେ ଘୋଷଣା ହୋଇଥିଲା, ୨୭ ତାରିଖ ବେଳକୁ ଏଥିରେ ସଂଶୋଧନ କରାଯାଇଛି। କିଛି ନୂଆ ସଦସ୍ୟଙ୍କୁ ଏଥିରେ ସାମିଲ କରାଯାଇଛି। ଟିମ୍ ଗଠନ ଓ ସଂଶୋଧନ ଭିତରେ ରାଜ୍ୟ ଡ୍ରଗ୍ ଟାସ୍କ ଫୋର୍ସ ଉତ୍ତର ପ୍ରଦେଶ ଯାଇପାରିଲା ନାହିଁ। ଯାହାଫଳରେ ନକଲି ଔଷଧ ଘଟଣାରେ ରାଜ୍ୟ ଡ୍ରଗ୍ ଟିମ୍ ଚଢ଼ଉ କରିଥିଲେ ରାଜ୍ୟକୁ ଯେଉଁ ସଫଳତା ମିଳିବା କଥା ତାହା ହାତଛଡ଼ା ହୋଇଗଲା।
ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ଯେ ନକଲି ଔଷଧ ଘଟଣାରେ ରାଜ୍ୟ ସ୍ବାସ୍ଥ୍ୟ ସଚିବ ଶାଳିନୀ ପଣ୍ଡିତ ଉତ୍ତର ପ୍ରଦେଶ ସରକାରଙ୍କ ସ୍ବାସ୍ଥ୍ୟ ବିଭାଗର ପ୍ରମୁଖ ସଚିବଙ୍କୁ ଚିଠି ଲେଖି ଅନୁରୋଧ କରିଥିଲେ। ଓଡ଼ିଶା ଟିମ୍ର ପ୍ରାପ୍ତ ସୂଚନା ଅନୁସାରେ, ଉତ୍ତର ପ୍ରଦେଶର ବିଭିନ୍ନ ସ୍ଥାନରେ ଚଢ଼ଉ ହୋଇଥିଲା। ବୁଲନ୍ଦସହରର ଅଶୋକ କୁମାରଙ୍କ ଗିରଫ ଓ ତାଙ୍କ ସ୍ବୀକାରୋକ୍ତି ଭିତ୍ତିରେ ଲହତାରା ଥାନା ଅଧୀନ ଅନ୍ୟ ଏକ ଗୋଦାମ ଉପରେ ଚଢ଼ଉ କରାଯାଇଥିଲା।
ଉଲ୍ଲେଖଥାଉକି, ବରଗଡ଼ ଓ ଝାରସୁଗୁଡ଼ାର ଦୁଇଟି ଦୋକାନରୁ ଏକାଧିକ ନକଲି ଔଷଧ ଗତବର୍ଷ ସେପ୍ଟେମ୍ବର ମାସରେ ଚିହ୍ନଟ ହୋଇଥିଲା। ରାଜ୍ୟ ସରକାରଙ୍କ ପକ୍ଷରୁ ଗଠିତ ସ୍ବତନ୍ତ୍ର ଡ୍ରଗ୍ ଟାସ୍କଫୋର୍ସ ଗତମାସରେ ଚଢ଼ାଉ କରିଥିଲା। ଚିହ୍ନଟ ନକଲି ଔଷଧ ଉତ୍ତର ପ୍ରଦେଶ ବାରାଣାସୀରୁ ଆସିଥିବା ଜଣାପଡ଼ିଥିଲା।