ନିକଟରେ ଦେଶର ୩ଟି ରାଜ୍ୟର ବିଧାନସଭା ନିର୍ବାଚନ ସରିଥିବା ବେଳେ ଆଗକୁ ପୁଣି କିଛି ରାଜ୍ୟରେ ନିର୍ବାଚନ ହେବାକୁ ଯାଉଛି । ଆସନ୍ତା ୨୦୨୪ ଲୋକସଭା ନିର୍ବାଚନକୁ ଆଉ କମ୍ ସମୟ ରହିଥିବା ବେଳେ ଏବେ ଦେଶର ରାଜନୈତିକ ମହଲ ଚଳଚଞ୍ଚଳ ହୋଇଉଠିଛି । ତେବେ ଏହା ମଧ୍ୟରେ ଦେଖିବାକୁ ମିଳିଛି ଏକ ବଡ଼ ଘଟଣା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟକୁ ବିପକ୍ଷ ଦଳର ୯ ଜଣ ନେତା ଖୋଲା ଚିଠି ଦେଇଛନ୍ତି ।
ସୂଚନା ମୁତାବକ, ବିରୋଧୀ ଦଳର ୯ ଜଣ ନେତା ମୋଦୀଙ୍କୁ ପଠାଇଥିବା ଚିଠିରେ ଏକ ବଡ଼ ଅଭିଯୋଗ କରିଛନ୍ତି । କେନ୍ଦ୍ରୀୟ ବ୍ୟୁରୋ ଅଫ୍ ଇନଭେଷ୍ଟିଗେସନ ଓ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଦୂରୁପଯୋଗ କରାଯାଉଛି । ସେଥିପାଇଁ ଏହି ନେତାମାନେ ବିଜେପି ସରକାରକୁ ନିନ୍ଦା କରିଛନ୍ତି । ଉକ୍ତ ଚିଠିରେ ଅସମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କୁ ମଧ୍ୟ ଟାର୍ଗେଟ କରାଯାଇଛି । ବିରୋଧୀ ଦଳର ଯେଉଁ ନେତାମାନେ ବିଜେପିରେ ସାମିଲ ହେଉଛନ୍ତି ସେମାନଙ୍କ ବିରୋଧରେ ଦୁର୍ନୀତି ସମ୍ବନ୍ଧୀୟ ତଦନ୍ତ ଶିଥିଳ ପଡ଼ିଯାଉଥିବା ନେଇ ଚିଠିରେ ଉଲ୍ଲେଖ କରାଯାଇଛି ।
ଗତ ମାସ ୨୬ ତାରିଖରେ ଦୀର୍ଘ ସମୟ ଧରି ପଚରାଉଚରା କରିବା ପରେ ଦିଲ୍ଲୀ ଡେପୁଟି ସିଏମ ମନୀଷ ସିସୋଦିଆଙ୍କୁ ସିବିଆଇ ଗିରଫ କରିଥିଲା । ମାତ୍ର ଗିରଫ ସମୟରେ ତାଙ୍କ ବିରୋଧରେ କୌଣସି ପ୍ରମାଣ ଦେଖା ଯାଇନଥିଲା । ୨୦୧୪ ପରେ ଯେଉଁ ସବୁ ନେତାମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି, ସେମାନଙ୍କ ମଧ୍ୟରୁ ଅଧିକାଂଶ ବିପକ୍ଷ ପାର୍ଟିର ଅଟନ୍ତି ।