ଆଫ୍ରିକାର ନାମ୍ବିଆରୁ କୁନୋ ଜାତୀୟ ଉଦ୍ୟାନକୁ ଅଣାଯାଇଥିବା ଚିତାବାଘ ମଧ୍ୟରୁ ଗୋଟିଏ ନିକଟସ୍ଥ ଗାଁକୁ ପଶିଯାଇଛି। ଗାଁ ଲୋକେ ଚିତାବାଘକୁ ଦେଖି ଆତଙ୍କିତ ହେବା ସହିତ ଜଙ୍ଗଲ ବିଭାଗକୁ ଖବର ଦେଇଛନ୍ତି। ଜିଲା ଜଙ୍ଗଲ ଅଧିକାରୀ (ଡିଏଫଓ)ଙ୍କ କହିବା ଅନୁଯାୟୀ ନାମ୍ବିଆରୁ ଅଣାଯାଇଥିବା ଓବାନ ନାମକ ଏକ ଚିତାବାଘ ଜାତୀୟ ଉଦ୍ୟାନ ଠାରୁ ୨୦କିମି ଦୂର ଝାର ବରୋଦା ଗ୍ରାମକୁ ଚାଲିଯାଇଛି। ବାଘଟିକୁ ଜଙ୍ଗଲକୁ ଫେରାଇ ଆଣିବା ଲାଗି ଜଙ୍ଗଲ ବିଭାଗର ଏକ ଦଳକୁ ସେଠାକୁ ପଠାଯାଇଛି। ଜଙ୍ଗଲ ବିଭାଗ ଦଳ ବାଘଟିକୁ ଆଣିବା ଲାଗି ଉଦ୍ୟମ ଚଳାଇଛନ୍ତି। ସେହିପରି ରାଜ୍ୟ ବନ୍ୟପ୍ରାଣୀ ଅଧିକାରୀ ଯଶବୀର ସିଂହ ଚୌହାନ କହିଛନ୍ତି ଯେ ଚିତାବାଘ ଜଙ୍ଗଲ ଛାଡି ଗାଁ ପଳାଇଯିବା ଘଟଣା ସତ୍ୟ। ବାଘର ଗତିବିଧି ଉପରେ ନଜର ରଖାଯାଇଛି। ଏହାକୁ ଖୁବ୍ଶୀଘ୍ର ଜଙ୍ଗଲ ମଧ୍ୟକୁ ଅଣାଯିବ।
ଗତବର୍ଷ ସେପ୍ଟେମ୍ବରରେ ଭାରତ ସରକାର ନାମ୍ବିଆରୁ ୮ଟି ଚିତାବାଘ ଆଣି କୁନୋ ଜାତୀୟ ଉଦ୍ୟାନରେ ଛାଡିଥିଲେ। ଏଥିରୁ ୫ଟି ମାଈ ଓ ୩ଟି ଅଣ୍ଡିରା ବାଘ ଥିଲେ। ଦୀର୍ଘ ୭୦ବର୍ଷ ପରେ ଭାରତ ମାଟିକୁ ଚିତାବାଘ ଆସିଥିଲେ। ତେବେ ମାର୍ଚ୍ଚ ୨୭ ତାରିଖରେ ଶାଶା ନାମକ ଗୋଟିଏ ମାଈ ବାଘ ବୃକ୍କ ଜନିତ ରୋଗରେ ପ୍ରାଣ ହରାଇଥିଲା। ସେହିପରି ମାର୍ଚ୍ଚ ୨୯ରେ ଏକ ମାଈ ଚିତାବାଘ ୪ଟି ଛୁଆ ଜନ୍ମ ଦେଇଥିଲା।