ନୂଆଦିଲ୍ଲୀ:ରାଜନୀତିରୁ ସୋନିଆ ଗାନ୍ଧୀ ଅବସରରେ ନେବେ ବୋଲି ବହୁ ଗତକାଲି ଚର୍ଚ୍ଚା ହେଉଥିଲା । ଆଉ ଆଜି ଏହି କଥାରେ ଆଉ ଏକ ନୂଆ ମୋଡ ଆସିଛି । ସୋନିଆ ରାଜନୀତିରୁ ଅବସର ନେଉ ନାହାନ୍ତି ବୋଲି ଶୁଣିବାକୁ ମିଳୁଛି । କଂଗ୍ରେସର ପୂର୍ବତନ ସଭାପତି ସୋନିଆ ଗାନ୍ଧୀ ରାଜନୀତିରୁ ଅବସର ନେଇଥିବା ଖବରକୁ ପ୍ରତ୍ୟାଖ୍ୟାନ କରିଛନ୍ତି। ସେ କହିଛନ୍ତି ଯେ ସେ କେବେ ଅବସର ନେଇ ନାହାଁନ୍ତି କିମ୍ବା ସେ କେବେ ବି କରିବେ ନାହିଁ। କଂଗ୍ରେସ ନେତା ଅଲକା ଲାମ୍ବା ଏହି ସୂଚନା ଦେଇଛନ୍ତି।
ଏହି ପ୍ରସଙ୍ଗରେ ସୋନିଆ ଗାନ୍ଧୀଙ୍କ ସହ ତାଙ୍କର କଥାବାର୍ତ୍ତା ହୋଇଥିବା ଅଲକା ଲାମ୍ବା କହିଛନ୍ତି। ଅଲକା କହିଛନ୍ତି, ‘ମୁଁ ତାଙ୍କୁ ଗଣମାଧ୍ୟମରେ ଆସୁଥିବା ଖବର ବିଷୟରେ ମ୍ୟାଡାମ୍ ଙ୍କ ସହ କଥା ହେଇଥିଲି, ସେ ହସି ହସି କହିଥିଲେ ଯେ ମୁଁ କେବେ ଅବସର ନେଇ ନାହିଁ ଏବଂ ଭବିଷ୍ୟତରେ କେବେବି ନେବି ନାହିଁ।
ସୋନିଆ ଗାନ୍ଧୀଙ୍କ ଏହି ବିବୃତ୍ତି ଆସିଛି କାରଣ ରାୟପୁରରେ ତାଙ୍କର ଭାବପ୍ରବଣ ଭାଷଣ ପରେ ସୋନିଆ ବର୍ତ୍ତମାନ ରାଜନୀତିରୁ ଅବସର ନେଇପାରନ୍ତି ବୋଲି ଅନୁମାନ କରାଯାଉଥିଲା। ବାସ୍ତବରେ ଛତିଶଗଡର ରାଜଧାନୀ ରାୟପୁରରେ ୮୫ ତମ କଂଗ୍ରେସ ଅଧିବେଶନ ଚାଲିଛି।
ରାୟପୁରରେ କାର୍ଯ୍ୟକ୍ରମ ସମୟରେ ଦଳର ପୂର୍ବତନ ସଭାପତି ସୋନିଆ ଗାନ୍ଧୀ ଭାଷଣ ଦେବାବେଳେ ଭାବପ୍ରବଣ ହୋଇଥିଲେ। କଂଗ୍ରେସ ସଭାପତି ଭାବରେ ତାଙ୍କ ଯାତ୍ରା ବିଷୟରେ ସୋନିଆ ଗାନ୍ଧୀ ତାଙ୍କ ସହକର୍ମୀଙ୍କୁ ଧନ୍ୟବାଦ ଜଣାଇଛନ୍ତି। ଏହି ସମୟରେ ସୋନିଆ ଗାନ୍ଧୀଙ୍କ କଂଗ୍ରେସ ସଭାପତି ଭାବରେ ଯାତ୍ରା ତଥା ଦଳରେ ତାଙ୍କର ଅବଦାନକୁ ଦର୍ଶାଇଥିବା ଏକ ଭିଡିଓ ଭାଇରଲ ହେଇଥିଲା। ଯାହା ପରେ ବହୁତ କଳ୍ପନାଜଳ୍ପନା ଚାଲିଥିଲା ଯେ ସୋନିଆ କଂଗ୍ରେସରୁ ଅବସର ନେଇପାରନ୍ତି।