ଭୁବନେଶ୍ବର : ଚଳିତ ହକି ବିଶ୍ବକପ୍ରେ ଭାରତ ଆଗକୁ ବଢ଼ି ପାରିବ କି ନା ରବିବାର ସ୍ପଷ୍ଟ ହୋଇଯିବ। ରବିବାରଠାରୁ ଅସଲ ଲଢ଼େଇ ଅର୍ଥାତ୍ ନକ୍ ଆଉଟ୍ ପର୍ଯ୍ୟାୟ ଆରମ୍ଭ ହେଉଥିବାରୁ ଭାରତ ପାଇଁ ନ୍ୟୁଜିଲାଣ୍ଡ୍ ବିପକ୍ଷ ମୁକାବିଲା ‘କର ବା ମର’ ଭଳି ହୋଇଛି। ଭାରତ ୩ ମ୍ୟାଚ୍ ଖେଳି ଅପରାଜେୟ ରହିଥିଲେ ମଧ୍ୟ ପୁଲ୍ ‘ଡି’ରେ ଦ୍ବିତୀୟ ସ୍ଥାନରେ ରହିବାରୁ ଏହି କ୍ରସ୍ ଓଭର ମ୍ୟାଚ୍ ଖେଳିବ। ହକିରେ ସଫଳତା ଦୃଷ୍ଟିରୁ ବିଶେଷ ଭାବେ ପରିଚିତ ନଥିବା ନ୍ୟୁଜିଲାଣ୍ଡ୍ କିନ୍ତୁ ପ୍ରତିଦ୍ବନ୍ଦ୍ବୀ ଭାବେ ସବୁବେଳେ ଏକ ଜଟିଳ ଦଳ। ସେହି ଦୃଷ୍ଟିରୁ ଭାରତ ଘରୋଇ ପରିବେଶ ଓ ଦର୍ଶକଙ୍କ ସମ୍ମୁଖରେ ସକାରାତ୍ମକ ଭାବନାରେ ଖେଳିଲେ ନିଶ୍ଚିତ ଆଗକୁ ବଢ଼ିପାରିବ।
ରବିବାର ମ୍ୟାଚ୍ ଜିତିଲେ ଭାରତ ମଙ୍ଗଳବାର ରାତିରେ କ୍ବାର୍ଟରଫାଇନାଲ୍ରେ ବିଶ୍ବକପ୍ ଓ ଅଲିମ୍ପିକ୍ ବିଜେତା ବେଲଜିୟମ୍କୁ ଭେଟିବ। ଅର୍ଥାତ୍ ଭାରତ ପାଇଁ ଏବେ ଏଭେରେଷ୍ଟ ଚଢ଼ିବାର କଷ୍ଟକର ଲକ୍ଷ୍ୟ ରହିଛି। ତଥାପି ନିକଟ ଅତୀତରେ ନ୍ୟୁଜିଲାଣ୍ଡ୍କୁ ଭାରତ ଦୁଇ ଥର ମାତ୍ ଦେଇଥିବାରୁ ହର୍ମନପ୍ରୀତ୍ ସିଂହଙ୍କ ଦଳ ଆତ୍ମବିଶ୍ବାସରେ ରହିଛି। ଗତ ନଭେମ୍ବର ମାସରେ କଳିଙ୍ଗ ଷ୍ଟାଡିୟମ୍ରେ ହିଁ ଭାରତ ଏଫ୍ଆଇଏଚ୍ ଲିଗ୍ର ପ୍ରଥମ ପର୍ଯ୍ୟାୟର ଉଭୟ ମୁକାବିଲାରେ ଏହି ବ୍ଲାକ ଷ୍ଟିକ୍ ଦଳକୁ ୪-୩ ଓ ୭-୪ ଗୋଲ୍ରେ ହରାଇଥିଲା। ବିଶ୍ବ ମାନ୍ୟତା ଦୃଷ୍ଟିରୁ ଭାରତ ଷଷ୍ଠ ଓ ନ୍ୟୁଜିଲାଣ୍ଡ୍ ୧୨ ନମ୍ବର ଥିବାରୁ ଘରୋଇ ଦଳ ନିଶ୍ଚିତ ଫାଇଦାରେ ରହିବ। ଭାରତୀୟ ଦଳ ସହ ଦ୍ବାଦଶ ଖେଳାଳି ଭାବେ ଖେଳିବେ କଳିଙ୍ଗ ଦର୍ଶକ। ଅମିତ ରୋହିଦାସ ଓ ନୀଲମ ସଂଜୀପ ଖେସ୍ଙ୍କ ଉପରେ ନିଶ୍ଚିତ ଓଡ଼ିଆ ଦର୍ଶକଙ୍କ ବିଶେଷ ନଜର ରହିବ ରବିବାର।
ଚଳିତ ବିଶ୍ବକପ୍ରେ ନ୍ୟୁଜିଲାଣ୍ଡ୍ ତୁଳନାରେ ଭାରତ ଢେର ଭଲ କରିଛି। ଭାରତ ପୁଲ୍ ପର୍ଯ୍ୟାୟରେ ସ୍ପେନ୍କୁ ୨-୦ରେ, ୱେଲ୍ସକୁ ୪-୨ରେ ପରାସ୍ତ କରିଥିବା ବେଳେ ଇଂଲଣ୍ଡ ସହ ଗୋଲଶୂନ୍ୟ ଡ୍ର’ ରଖିଥିଲା। ନ୍ୟୁଜିଲାଣ୍ଡ୍ କିନ୍ତୁ ୨ଟି ପରାଜୟ ସତ୍ତ୍ବେ ନବାଗତ ଚିଲିକୁ ହରାଇଥିବାରୁ ପୁଲ୍ ‘ସି’ର ତୃତୀୟ ଦଳ ହୋଇପାରିଛି। ନ୍ୟୁଜିଲାଣ୍ଡ୍ କିନ୍ତୁ ନେଦରଲାଣ୍ଡ୍ସ ଓ ମାଲେସିଆ ନିକଟରୁ ହାରିଯାଇଥିଲା। ନ୍ୟୁଜିଲାଣ୍ଡ୍ କେବେ ବି ହକି ବିଶ୍ବକପ୍ର ସେମିଫାଇନାଲ୍ ଉଠି ପାରିନାହିଁ।
୧୯୭୫ ମସିହାରେ ପ୍ରଥମ ଓ ଶେଷ ଥର ପାଇଁ ବିଶ୍ବକପ୍ ଜିତିଥିବା ଭାରତ ଏବେ ୪୮ ବର୍ଷ ପଦକ ମରୁଡିର ଅନ୍ତ ଘଟାଇପାରିବ କି ନା ପ୍ରଶ୍ନ ଉଠିଛି। ଆକାଶଦୀପ ସିଂହ ଫର୍ମକୁ ଫେରିବା ଭାରତ ପାଇଁ ଖୁସିର ଖବର ହୋଇଥିଲେ ମଧ୍ୟ ଅଧିନାୟକ ହର୍ମନପ୍ରୀତ୍ ସିଂହ ପେନାଲ୍ଟି କର୍ଣ୍ଣର ରୂପାରନ୍ତରଣରେ ବିଫଳ ହେଉଥିବାରୁ ଦଳର ଚିନ୍ତା ବଢ଼ିଛି। ପ୍ରଥମ ଦୁଇ ମ୍ୟାଚ୍ରେ ଚମତ୍କାର ଖେଳିଥିବା ହାର୍ଦିକ ସିଂହ ଆହତ କାରଣରୁ ବିଶ୍ବକପ୍ରୁ ବାଦ୍ ପଡ଼ିଥିବାରୁ ମଧ୍ୟ ଦଳ ଉପରେ ଚାପ ପଡ଼ିଛି। ଆକାଶଦୀପ ସିଂହ, ମନ୍ରପୀତ୍ ସିଂହ, ମନଦୀପ ସିଂହଙ୍କ ସହ ଗୋଲରକ୍ଷକ ପିଆର୍ ଶ୍ରୀଜେଶଙ୍କ ଭଳି ଅଭିଜ୍ଞ ଖେଳାଳିଙ୍କ ଉପରେ ଭାରତର ଭାଗ୍ୟ ନିର୍ଣ୍ଣୟ କରିବ। ପେନାଲ୍ଟି କର୍ଣ୍ଣର ରୂପାନ୍ତରଣରେ ଭାରତ ଏକ ପ୍ରକାର ନିଷ୍ଫଳ ରହିଛି। ବିଗତ ୩ ମ୍ୟାଚ୍ରୁ ୧୬ଟି ଅର୍ଜନ କରିଥିଲେ ମଧ୍ୟ ମାତ୍ର ୩ଟି ଗୋଲ୍ ପାଇଛି। ସେଥିରୁ ପୁଣି ହର୍ମନପ୍ରୀତ୍ ୱେଲ୍ସ ବିପକ୍ଷରେ ପାଇଥିବା ପିସି ଗୋଲ୍ଟି ପ୍ରତିପକ୍ଷର ଗୋଲ୍ରକ୍ଷକ ନଥିବାବେଳେ ହାସଲ କରିଥିଲେ। ସବୁ ଦୃ୍ଷ୍ଟିରୁ ଭାରତ ନିଶ୍ଚିତ ଭାବେ ନ୍ୟୁଜିଲାଣ୍ଡ୍ ବିପକ୍ଷରେ ଦାବିଦାର ଦଳ। କିନ୍ତୁ କିଛି ହରାଇବାକୁ ନଥିବାରୁ ନ୍ୟୁଜିଲାଣ୍ଡ୍ର ଉତ୍ସାହକୁ ପ୍ରତିହତ କରିବାକୁ ଭାରତ ନିଶ୍ଚିତ ତ୍ରୁଟିଶୂନ୍ୟ ଖେଳ ଦେଖାଇବାର ଅଛି। ନ୍ୟୁଜିଲାଣ୍ଡ୍ ବିପକ୍ଷ ମ୍ୟାଚ୍ ଏତେ ସହଜ ହେବ ନାହିଁ। ଗତ ଏଫ୍ଆଇଏଚ୍ ପ୍ରୋ ଲିଗ୍ର ପ୍ରଥମ ମ୍ୟାଚ୍ରେ ଏହି ଦଳ କଡ଼ା ଟକ୍କର (୪-୩) ଦେଇଥିଲା। ଦ୍ବିତୀୟ ମୁକାବିଲାଟି ଅପେକ୍ଷାକୃତ ସହଜ ଥିଲା। ଆମକୁ କିନ୍ତୁ ଶ୍ରେଷ୍ଠ ହକି ଖେଳିବାକୁ ହେବ ବୋଲି କହିଛନ୍ତି ଭାରତୀୟ ଦଳ ପ୍ରଶିକ୍ଷକ ଗ୍ରାହାମ ରିଡ୍। ଭାରତ ଗସ୍ତରେ ଥିବା ନ୍ୟୁଜିଲାଣ୍ଡ୍ କ୍ରିକେଟ୍ ଦଳ ଶନିବାର ଭାରତଠୁ ଶୃଙ୍ଖଳା ହାରିଥିବାରୁ ଭାରତୀୟ ହକି ଦଳ ଏଥିରେ ଉତ୍ସାହିତ ହୋଇ ରବିବାର ମଇଦାନକୁ ଓହ୍ଲାଇବ ବୋଲି କ୍ରୀଡ଼ାପ୍ରେମୀମାନେ ଆଶା କରିଛନ୍ତି।
recommended by